- Suraj Dheere Dheere Pighla Phir Taaron Mein Dhalne Laga
- Aise Kai Sawaal Hain Jinka Jawaab Kuch Nahi
- Band Karle Khidkiyan Yun Raat Ko Bahar Na Dekh
- Lakadhaare Tumhare Khel Ab Ache Nahi Lagte
- Shaam Aayi Sehen-E-Jaan Mein Khauf ka Bistar Laga
- Aana Usi Ka Bazm Se Jaana Usi Ka Hai
- Shaam Ke Saahil Pe Sooraj Ka Safeena Aa Laga
- Kabhi Sehra Mein Rahte Hain Kabhi Paani Mein Rehte Hain
- Zer-E-Zamin Dabi Hui Khaak Ko Aasan Kaho
- Kitaab Padhte Rahe Aur Udaas Hote Rahe
- Tilism Hai Ki Tamasha Hai Kainaat Us Ki
- Ek Benaam-O-Nishaan Ruh Ka Paikar Hoon Main
- Kai Raaton Se Bas Ek Shor Sa Kuch Sar Mein Rehta Hai
- Teergi Chaand Ko Inaam-E-Wafa Deti Hain
- Safar Naseeb Agar Ho Tou Yeh Badan Kyun Hai
- Yeh Rishta-E-Jaan Meri Tabaahi Ka Sabab Hai
- Samajh Sake Na Jise Koi Bhi Sawaal Aisa
- Shola Shola Thee Hawa Sheesha-E-Shab Se Poocho
- Is tarah ishq mein barbaad nahi reh sakte
- Bas ek Vaham satata hai baar baar mujhe
- Ab Qais Hai Koi Na Koi Aabla-Pa Hai
- Hjir Ka Kissa Bahut Lamba Nahin Bas Raat Bhar Hai
- Phir Laut Ke Is Bazm Mein Aane Ke Nahin Hain
- Woh ek shor sa zindan mein raat bhar kya tha
- Kyun pareshan hua jaata dil kya jaane
- Har Naqsh-E-Nawa Laut Ke Jaane Ke Liye Tha
- Parchhaiyon Ki Baat Na Kar Rang-E-Haal Dekh
- Roz-O-Shab Ki Gutthiyaan Aankhon Ko Suljhaane Na De
- Neele Peele Siyah Surkh Safed Sab They Shaamil Isi Tamashe Mein
- Tumhare chaak par ai kooza-gar lagta hai darr hum ko
Suraj Dheere Dheere Pighla Phir Taaron Mein Dhalne Laga
Suraj dheere dheere pighla phir taaron mein dhalne laga
Mere andar ka sannata jaag ker aankhein malne laga
Shaam ne barf pehan rakhi thee raushniyaan bhi thandi theen
Main is thandak se ghabra kar apni aag mein jalne laga
Saara Mausam badal chuka tha phool bhi the aur aag bhi thee
Raat ne jab yeh swaang rachaya chaand bhi roop badalne laga
Aavazon ke ang ang mein dard ke nashtar chubhne lage
Pyaasi aankhon ke sehra mein ret ka jhakkad chalne laga
Neele Surkh safed sunhare, ek ek karke doob gaye
Samton ki har pagdandi per kaala rang pighalne laga
*** Go to Top ***
Aise Kai Sawaal Hain Jinka Jawaab Kuch Nahi
Aise kai sawaal hain jinka jawaab kuch nahin
Harf-o-sada fuzool sab lauh-o-kitaab kuch nahin
Unse kaho ki is tarah aankhon se badguman na hon
Kaise ajeeb log hain kahte hain Khwaab kuch nahin
Baithe-bithaye dil yuhin khud se uchaat ho gaya
Anjuman-e-hawas mein waise kharab kuch nahin
Farq bahut nahin yahan shaam-o-sahar ke darmiyaan
Pyaas agar dabi rahe aag-o-saraab kuch nahin
Jaan ka bas ek qarz hai woh bhi utar hi jayega
Aur kai Azeez ka hum per hisaab kuch nahin
*** Go to Top ***
Band Karle Khidkiyan Yun Raat Ko Bahar Na Dekh
Band karle khidkiyan yun raat ko bahar na dekh
Doobti aankhon se apne Shahr ka manzar na dekh
Kya pata zanjeer mein dhal jaaye bistar ki shikan
Ye safar ka waqt hai Jaanin-e-bistar na dekh
Khaab-o-Khuun miraas teri Khaak-o-Khuun tera naseeb
Is ziyaan-khaane mein apne paanv ka chakkar na dekh
Tune jo parchaiyaan chhodin woh sehra ban gayin
Ai aigar-e-waqt ab peeche kabhi mud kar na dekh
*** Go to Top ***
Lakadhaare Tumhare Khel Ab Ache Nahi Lagte
Lakadhaare tumhare khel ab ache nahi lagte
Hamein tou yeh tamashe sab-ke-sab ache nahi lagte
Ujale mein hamein sooraj bahut acha nahi lagta
Sitare bhi Sar-e-daaman-e-shab ache nahi lagte
Tou yeh hota hai ki hum ghar se nikalna chhodh dete hain
Kabhi apni gali ke log jab acche nahi lagte
Yeh keh dena ki unse koi gila-shikwa nahi hum ko
Magar kuch log yun hi be-sabab ache nahi lagte
Na raas aayegi jeene ki aada shayad kabhi hum ko
Kabhi Jeena kabhi Jeene ke dhab achche nahi lagte
*** Go to Top ***
Shaam Aayi Sehen-E-Jaan Mein Khauf ka Bistar Laga
Shaam aayi sehen-e-jaan mein khauf ka bistar laga
Mujh ko apni ruuh ki viraniyon se dar laga
Ek Lahme ki shararat thee ki har lamha mujhe
Aap-Apni samt se aata hua pathar laga
Dhundh si phaili hui thee aasmaan per duur tak
Mauj-e-reg-e-ravan mujh ko tera paikar laga
Khana-e-dil ko sajana hai ek shauq-e-fuzool
Kaun Jhankega yahan yeh Aaine-e-bahar laga
Jagne walon ki basti se guzar jaate hain khwaab
Bhool thee kiski magar ilzaam raton per laga
Khamoshi ki Chaar-diwari bhi shayad gir chuki
Aaj jaane kya hua woh shakhs bhi be-ghar laga
Aana Usi Ka Bazm Se Jaana Usi Ka Hai
Aana usi ka bazm se jaana usi ka hai
Kis ko Pata nahin ki zamana uski ka hai
Ai matla-e-malaal hamare liye bhi kuch
Taron bhari yeh raat khazana usi ka hai
Is ghar mein koi cheez kisi aur ki nahin
Ye Phool ye Charaagh fasana usi ka hai
Ek Ahad kar liya tha kabhi bhool-chook mein
Saanson ka ye wabaal bahana usi ka hai
Ab is gali ke mod se aage na jaayenge
Kahte hain aas-paas thikaana usi ka hai
Shaam Ke Saahil Pe Sooraj Ka Safeena Aa Laga
Shaam ke saahil pe sooraj ka safeena aa laga
Doobti aankhon ko yeh manzar bahut acha laga
Dard ke patthar sabhi aab-e-ravaan mein ghul gaye
Shor tha kitna magar aankhon ko sannata laga
Chaar-soo phaili hui mauj-e-nafas ki goonj thee
Mujh ko pyaasi ret ka sahra bhi ek dariya laga
Anginat saaye teri tasweer mein dhalte gaye
Chaandni jaagi tou har chehra tera chehra laga
Kabhi Sehra Mein Rahte Hain Kabhi Paani Mein Rehte Hain
Kabhi sehra mein rahte hain kabhi paani mein rahte hain
Na jaane kaun hai jiski nigahbaani mein rahte hain
Zamin se aasmaan tak apne hone ka tamasha hai
Yeh saare silsile ek lamha-e-faani mein rahte hain
Savera hote-hote roz aa jaate hain saahil per
Safeene raat per dariya ki tughyaani mein rehte hain
Pata aankhein ko milta hain yahin sab jaane walon ka
Sabhi is aaina-khane ke hairaani mein rahte hain
Idhar hum hain ki har kaar-e-jahan duhshwaar hain hum ko
Udhar kuch log har mushkil ki aasani mein rehte hain
Kise ye neeli-peeli titliyaan achi nahi lagtin
Ajab kya hai jo hum bachchon ki nadani mein rehte hain
Yahi be-chehra-o-be-naam ghar apna thikaana hai
Hum ek bhoole hue manzar ki viraani mein rehte hain
Zer-E-Zamin Dabi Hui Khaak Ko Aasan Kaho
Zer-e-zamin dabhi hui khaak ko aasan kaho
Harf-e-kharaab-o-khasta ko zid hai ki dastan kaho
Aab-e-siyaah pher do baab-e-wafa ke naqsh per
Shahr-e-ana mein jab kabhi kissa-e-digaraan kaho
Kaun shareek-e-dard tha aatish-e-sard ke siwa
Raakh haqeer thee magar raakh ko meharbaan kaho
Duur khala ke dasht mein misl-e-sharar sabt hain
Kisi ne unhe khafa kiya kyun hue badguman kaho
Sang-e-saza ka khauf bhi bistar-e-jaan se uth gaya
Saltanat-e-Jalal ko tooti hui Kamaan kaho
Aaina-e-saraab hai gard pas-e-habaab hai
Tehri hui hai zindagi phir bhi ise ravaan kaho
Shaam hui tou jal uthe raat dhali tou bujh gaye
Hum bhi yunhi fana hue hum ko bhi raigaan kaho
Kitaab Padhte Rahe Aur Udaas Hote Rahe
Kitaab padhte rahe aur udaas hote rahe
Ajeeb shakhs tha jiske azaab dhote rahe
Koi tou baat thee aisi ki is tamashe per
Hansi bhi aayi magar muh chupa ke rote rahe
Humin ko shauq tha duniya ko dekhne ka bahut
Hum apni aankhon mein khud suuiyaan chubhote rahe
Bas apne-aap ko paane ki justuju thee ki hum
Kharaab hote rahe aur khud ko khote rahe
Zamin ki tarah samundar bhi tha safar ke liye
Magar yeh kya ki yahan kashtiyaan duboote rahe
Humein khabar bhi na hui aur din bhi doob gaya
Chatakhti dhoop ka bistar bichaye sote rahe
Tilism Hai Ki Tamasha Hai Kainaat Us Ki
Tilism hai ki tamasha hai kainaat us ki
Chiraag-e-Hijr se raushan rahegi raat us ki
Zamin ho ki Zaman sab usi ke mohre hain
Bichi hui hai bahut duur tak bisaat us ki
Hamare saath bhi hote hain tajrabe uske
Hamare haal mein shamil hai vardaat us ki
Shikast-o-fatah mein kya farq hai nahin maloom
Ye kya ki jeet hamari hai aur maat us ki
Use khamosh bhi rehta tha ek pal ke liye
Samajh saka na koi anjuman mein baat us ki
Idhar yeh neend udhar jaagte hue saaye
Ajeeb silsila-e-khwaab hai hayat us ki
Ek Benaam-O-Nishaan Ruh Ka Paikar Hoon Main
Ek Benaam-o-Nishaan ruh ka paikar hoon main
Apni aankhon se ulajtha hua manzar hoon main
Kaun behte hue paani ko sada deta hai
Kaun dariya se yeh kahta hai samundar hoon main
Mujh ko daam-dhar ki rifaqat bhi hawa ko na mili
Apni parchha-ain se lipta hua pathhar hoon main
Yeh ujdi hui basti hai thikana mera
Dhoondhne waale isi khaak ke andar hoon main
Qahar ban jayengi yeh khoon ki pyaasi raahein
Zindagi mujhme simat aa ki tera ghar hoon main
Kai Raaton Se Bas Ek Shor Sa Kuch Sar Mein Rehta Hai
Kai raaton se bas ek shor sa kuch sar mein rehta hai
Ki woh but bhi nahin phir kis tarah pathhar mein rehta hai
Wahan sehra bhi hai jungle bhi dariya bhi chattanein bhi
Ajab duniya basa rakhi hai woh jis ghar mein rehta hai
Khilegi dhoop jab parchhaiyaan pedon se niklengin
Yeh manzar bhi isi simte hue manzar mein rehta hai
Buland-o-past ki tafrik kya sab ek jaise hain
Magar parvaaz ka sauda jo baal-o-par mein rehta hai
Isi baais zamin ki god se uth-ta nahi koi
Bahut aaraam girne tootne ke dar mein rehta hai
Teergi Chaand Ko Inaam-E-Wafa Deti Hain
Teergi chaand ko inaam-e-wafa deti hain
Raat bhar doobte sooraj ko sada deti hai
Maine chaha tha ki lafzon mein chupa loon khud ko
Khamoshi lafz ki deewaar gira deti hai
Koi saaya tou mila dhoop ke zindani ko
Meri vahshat teri chahat ko dua deti hain
Kitni sadiyon ke dariche mein hai bas ek wajood
Zindagi saans ko talwar bana deti hai
Qafas-e-rang mein din-raat wahi pyaas ka dard
Aagahi bhi mujhe jeene ki saza deti hai
Safar Naseeb Agar Ho Tou Yeh Badan Kyun Hai
Safar Naseeb agar ho tou yeh badan kyun hai
Dayar-e-ghair tumhare liye watan kyun hai
Hawa-e-shabnam-o-gul hai to bekhudi kaisi
Hisaar-e-zaat mein aashob-e-maa-o-man kyun hai
Bas ek aks-e-nazara hai inkishaaf-e-wajood
Kulah-e-sheesha-garan mein yeh baankpan kyun hai
Nishaat-e-be-talbi jada-e-najaat hua
Khabar nahi ki usi raah mein chaman kyun hai
Libaas-e-khaak shafaq-rang misl-e-shaakh-e-chinaar
Bisaat-e-sokhta aamoz fikr-o-fan kyun hai
Garan hai taab-e-zamana pe har sada-e-nafas
Khyaal-o-khwaab pe nukhton ka pairahan kyun hai
Yeh Rishta-E-Jaan Meri Tabaahi Ka Sabab Hai
Yeh Rishta-e-jaan meri tabaahi ka sabab hai
Yeh qaid se chuttne ki tamanna bhi ajab hai
Is arsa-e-mahshar mein khamoshi bhi sada hai
Tooti hui qabron mein bada shor-o-shaab hai
Sooraj ki yeh zid us ki ek boond na reh jaaye
Hotoon ko faqat pyaas bujhane ki talab hai
Chehre pe thakan saans ki zanjeer pareshan
Aankhon mein magar ab bhi wahi ghaiz-o-gazab hai
Kyun dil ko yeh hasrat hai kisi aur ko paale
Is Shahr mein mujhsa na koi pehle tha na ab hai
Samajh Sake Na Jise Koi Bhi Sawaal Aisa
Samajh sake na jise koi bhi sawaal aisa
Buna hai saans ke dhagon ne ek jaal aisa
Kabhi dimaagh tha mujh ko bhi khud-parasti ka
Palat ke zehen mein aaya na phir khayal aisa
Main aasmaan tou na tha jis mein chaand chup jaata
Hua na hoga kisi ka kabhi zawaal aisa
Tamaan umr naye Lafz ki talaash rahi
Kitaab-e-dard ka mazmun tha paimaal aisa
Kinaar-e-aab na pahunchegi jaan ki kashti
Bahut dinon se hai paani mein ishtial aisa
Shola Shola Thee Hawa Sheesha-E-Shab Se Poocho
Shola Shola thee hawa sheesha-e-shab se poocho
Ya mera haal mari taab-e-talab se poocho
Jaane kis mod pe in aankhon ne moti khoye
Bastiyan deed ki Viraan hai kabse poocho
Rasste logon ko kis samt liye jaate hain
Kya khabar kaun bata payega sab se poocho
Din nikalte hi sitaron ke safeene doobe
Din ke bujhne ka sabab mauj-e-tarab se poocho
Wahi din-raat wahi ek se lamhon ka hisaab
Sukhan aagaaz karoon umr ka jab se poocho
Khamoshi bhi to sunati hai fasane aksar
Kis tamashe mein hoon yeh bandish-e-lab se poocho
Is tarah ishq mein barbaad nahi reh sakte
Is tarah ishq mein barbaad nahi reh sakte
Itne kisse to hamein yaad nahi reh sakte
Hum Mohabbar ke kharabon ke makeen hain phir bhi
Umr bhar Maail-e-faryaad nahi reh sakte
Aap hi aap khinche jaate hain apni jaanib
Log chahein bhi to azaad nahi reh sakte
Ek awaaz si aati hai ajab kanon mein
Shahr ab der tak abaad nahi reh sakte
Bas ek Vaham satata hai baar baar mujhe
Bas ek Vaham satata hai baar baar mujhe
Dikhai deta hai patthar ke aar-paar mujhe
Mera khuda hai tou mujh mein utaar de mujh ko
Ki ek umr se apna hai intizaar mujhe
Main Lafz-Lafz bikharta raha fazaon mein
Meri sada se woh karta raha shikaar mujhe
Jo dhaal dete hain parchhai-yon ko patthar mein
Ab aise sakht dilon mein na kar shumaar mujhe
Hawa kuch aisi chali khoon ko Nishan na mila
Ghubaar-e-raah ko takta hoon main ghubaar mujhe
Hisaar-e-marg mein ghut jayegi sada teri
Tu duur hain tou zara der tak pukaar mujhe
Ab Qais Hai Koi Na Koi Aabla-Pa Hai
Ab qais hai koi na koi aabla-pa hai
Dil aath pehar apni hadein dhoond raha hai
Ahsaas ki waadi mein koi saut na surat
Yeh manzil-e-irfan tak aane ka sila hai
Zakhmon ke bayaban mein koi phool na patthar
Yaadon ke jazeere mein na but hain na khuda hai
Ek Khaak ke paikar ka tamasha hai sadak per
Har shakhs yahan qehar ki tasveer bana hai
Mitti ke gharounde mein sitaron ke diye hain
Aangan mein andhera na ujala na hawa hai
Ab anjuman-e-shauq mein shaamein na patinge
Ab marg-e-musalsal ki saza hai na jaza hai
Chashmon ko shikayat hai ki shoalon mein ghire hain
Sehra ko yeh dukh hai ki pada sookh raha hai
Ab nakhl-e-rah-e-shauq na saaye na manazil
Ab aabroo-e-ishq na sauda na wafa hai
Ab paanv musafir hain nafs marhala-e-zeest
Ab Waqt ke haathon pe na khoon hai na hina hai
Khoo.n-rang, shafaq-rang, khiza-rang hain chehre
Jismon pe qafan hai na koi surkh qaba hai
Sooraj ko hateli pe lakiron ki tammanna
Ab chaand ki thali mein kiran hai na diya hai
Ab dasht ke seene pe faqat aag bichi hai
Ab naqsh-e-qaf-e-pa hai na ab baang-e-dara hai
Har aankh chalati hui tashkeek ke neze
Har zehan tajasus ki rida odh chuka hai
Alfaaz ke chehre se Ayaan shaan-e—khamoshi
Honton per sawalaat ka ek jaal bicha hai
Kyun shaam ko bahon mein ulajhne ki hawas hai
Kyun subh ki palkon mein koi khwaab saja hai
Kyun raat ke maathe pe chamakte hain nagine
Kyun din ke rag-o-pai mein koi hashr bapa hai
Mashriq ke dhareechon se ghutan jhaank rahi hai
Maghrib ki fazaon mein dhuan phail chuka hai
Aashob-e-nazar ho ki tammannaon ke nashtar
Har tasht mein zakhmon ka ek ambaar laga hai
Mandir ke gajar khaak per ab chup se pade hain
Masjid ke manaron ka sira toot chuka hai
Deewaar bhi deewar se azaad nahi hai
Mauhum khalaon mein bhi zindaan-e-hawa hai
Suqraat tah-e-khaak yahi soch raha hai
Ab zehar faqat pyaas bujhane ki dawa hai
Ab najd ke sehra mein na kaantein na sadaein
Ab qais hai koi na koi aabla-pa hai
Yun raat jab aayi hai tou rukna hi pada hai
Dast-e-tah-e-sang-aamda paimaan-e-vafa hai
Majboori-o-dawaa-e-giraftari-e-ulfat
Har ahad mein tahzeeb ne yeh dhong racha hai
Hjir Ka Kissa Bahut Lamba Nahin Bas Raat Bhar Hai
Hijr ka kissa bahut lamba nahin bas raat bhar hai
Ek sannata magar chhaya hua ehsaas per hai
Ek samundar behisi ka ek kashti aarzoo ki
Haii kitni mukhtasar logon ki roodaad-e-safar hai
Main azal se chal raha hoon thak gaya hoon sochta hoon
Kya tiri duniya mein har manzil nishaan-e-rahguzar hai
Is faseel-e-gham ko sar karne pe bhi kya mil sakega
Ek deewar-e-hawa hai ek tera sang-e-dar hai
Doobne waale sitare ko bhala kab tak pukare
Zindagi ki raat ko sooraj ke hans dene ka dar hai
Dekh le mujh ko abhi kuch raushni baaqi hai mujh mein
Shaam tak ek ret ka toofaan aane ki khabar hai
Phir Laut Ke Is Bazm Mein Aane Ke Nahin Hain
Phir laut ke is bazm mein aane ke nahin hain
Hum log kisi aur zamane ke nahin hain
Ek duur kinara hai wahin jaa ke rukenge
Jitne bhi yahan ghar hain thikaane ke nahin hain
Yun Jagte rehna hai tou aankhon mein hamari
Jo Khwaab chupe hain nazar aane ke nahin hain
Dil hai tou yeh daulat kabhi maa-adum na hogi
Yeh dard kisi aur khazane ke nahin hain
Kal raat khamoshi ne ajab rang dikhae
Ye sher agar hain to sunane ke nahin hain
Har samt ujala bhi hai sooraj bhi hai lekin
Hum apne charaagon ko bujhane ke nahin hain
Duniya ne bhi kuch hum ko bahut gher liya hai
Kuch hum bhi use chhodh ke jaane ke nahin hain
Woh ek shor sa zindan mein raat bhar kya tha
Woh ek shor sa zindan mein raat bhar kya tha
Mujhe khud apne badan mein kisi ka darr kya tha
Koi tameez na ki khoon ki shararat ne
Ek abr-o-baad ka toofan tha dasht-o-dar kya tha
Zameen pe kuch tou mila chand uljhanein hi sahi
Koi na jaan saka aasmaan par kya tha
Mere zawaal ka har rang tujh mein shaamil hai
Tu aaj tak mere haalaat se be-khabar kya tha
Ab aisi fasl mein shaakh-o-samar pe baar na ban
Yeh bhool ja ki pas-e-saaya-e-shajar kya tha
Chitakhti girti hui chat ujaad darwaaze
Ek aise ghar ke siwa haasil-e-safar kya tha
Kyun pareshan hua jaata dil kya jaane
Kyun pareshan hua jaata dil kya jaane
Kaisa pagal hai ki paani ko bhi sehra jaane
Main woh awaara ki badal bhi khafa hai mujh se
Tu zamane ko bhi thahra hua lamha jaane
Dhoop ki gard fazaon mein dilon mein taboot
Har nafs khud ko bas ek aag ka dariya jaane
Oos ki boond bhi ab sang-sifat lagti hai
Phool ke baagh ko dil aag ka dariya jaane
Raat patthar mein dhali chaand bhi kaala nikla
Aise manzar ko bhi ab aankh tamasha jaane
Be-sada gumbad-e-ehsaas hua mohar-ba-lab
Phool ke dard ka kissa koi kaanta jaane
Din ki Khandaq ka dhuan shahr se aage bhi gaya
Kis tarah ghar ka pata koi parinda jaane
Har Naqsh-E-Nawa Laut Ke Jaane Ke Liye Tha
Har Naqsh-e-nawa laut ke jaane ke liye tha
Jo bhool chuka hoon woh bhulaane ke liye tha
Kuch bhed zamane ke bhi mujh per na khule the
Kuch main bhi riya-kaar zamane ke liye tha
Kuch maine bhi be-wajah hansi uski udaayi
Kuch woh bhi meri jaan jalane ke liye tha
Kuch log jaziron pe khade they so khade hain
Sailaab safeenon ko bahane ke liye tha
Pyasa jo na hota tou samundar se na milta
Dariya jo meri pyaas bujhane ke liye tha
Girni hi thee ek roz yeh deewar badan ki
Yeh raah ka patthar bhi hatane ke liye tha
Sab meri udasi mein tujhe dhoond rahe the
Hasna bhi mera tujh ko chupane ke liye tha
Ek Lahar ki bas khaak udaane pe ba-zid thee
Ek rang ki palkon mein sajane ke liye tha
Ek lamha-e-khali ki sada sabne suni thee
Ek shor khamoshi ko badhane ke liye tha
Kheera ( खीऱा ) hain nigahein tou na kuch dekh sakengin
Manzar jo yahan tha nazar aane ke liye tha
Aap-apni jasarat se tah-e-aab hua hai
Who doobne wale ko bachane ke liye tha
Parchhaiyon Ki Baat Na Kar Rang-E-Haal Dekh
Parchhaiyon ki baat na kar rang-e-haal dekh
Aankhon se ab hawa-o-hawas ka maal dekh
Do sher jis ke qahar ki jangal mein dhoom thee
Meri nashist-gah mein ab uski khaal dekh
Khushboo ki tarah goonj utha harf-e-aagahi
Ai dil zara hisaar-e-nafas ka zawaal dekh
Tujh se qareeb aaye tou apni khabar na thee
Duuri ka yeh azaab ba rang-e-visaal dekh
Bujhti hui sada ki tarah khud mein doob ja
Pesh-e-nigaah jab bhi tammanna ka jaal dekh
Palkon mein tez dhoop ka manzar samet le
Phir kaasa-e-badan mein lahu ka ubaal dekh
Roz-O-Shab Ki Gutthiyaan Aankhon Ko Suljhaane Na De
Roz-o-shab ki gutthiyaan aankhon ko suljhaane na de
Aur jaane ke liye utthoon tou woh jaane na de
Surmai gahra kaala be-jaan lamhon ka gubaar
Main na kehta tha gul-e-manzar ko murjhaane na de
Ya dil-e-wahshi pe yun ehsaas ki yurish na ho
Ya bhari aabaadiyon ko aise veerane na de
Aarzoo ke qehar se saanson ki kashti ko bacha
Baadbaanon ko hawa ke saath lehraane na de
Sun raha hoon der se jaate hue lamhon ki chaap
Ab kisi ko sarhad-e-idraak tak aane na de
Neele Peele Siyah Surkh Safed Sab They Shaamil Isi Tamashe Mein
Neele peele siyah surkh safed sab they shaamil isi tamashe mein
Yurish-e-gham ne zaleel kiya aankh gum ho gayi tamashe mein
Koi bhi inme chaarasaaz na tha sab beemaar-e-justuju nikle
Tum hi socho ki be-dili kis se raasta poochti tamashe mein
Jism ka sona roop ki chandni kaun s adhan kis ke paas raha
Ek mera tumhara qissa kya saari duniya luti tamashe mein
Chaand tha saahil-e-nafs ke qareeb ek din mere dil mein doob gaya
Subah ka raaz raii-gaan thahra shaam bhi ghul gayi tamashe mein
Kabhi dariya ke saath saath badhe kahin thit-ke kahin nazar na uthi
Ek umr-e-rawaan thee jee ka ziya so guzarti rahi tamashe mein
Ek shoala havas ka bas mein na tha aap-apne se haath dho baithe
Khaakh aaghaaz khaakh ki anjaam aag aisi lagi tamashe mein
Tumhare Chaak Par Ai Kooza-Gar Lagta Hai Darr Hum Ko
Tumhare chaak par ai kooza-gar lagta hai darr hum ko
Ajab pagal si ek parchhain aati hai nazar hum ko
Yeh kaisi baat hai din ki ghadi hai aur andhera hai
Chamakti dhoop mein sona pada hai raat bhar hum ko
Hamein ghar se nikalna tha tou yeh bhi soch lena tha
Ki sahab phir kabhi aana nahi hai laut ker hum ko
Abhi thoda sa shayad aur kuch qissa chukana hai
Abhi kuch aur thodi duur karna hai safar hum ko
Nahi maloom kis chakkar mein yeh haalat bana daali
Liye jaata hai ek dariya-e-be-tabi kidhar hum ko